Concello de Gondomar

O Concello de Gondomar iniciou a instalación de colectores adaptados para persoas con mobilidade reducida. Nesta primeira fase, colocouse un colector na rúa Ánimas, xunto ás prazas de estacionamento para as persoas con problemas de mobilidade. "A medida que recibamos máis unidades irémolas distribuíndo por todo o municipio" apunta Juan Carlos González Camesella, responsable da concellaría de Medio Ambiente e Servizos.

Esta semana tivo lugar a reunión do Comité de Seguridade e Saúde do Concello de Gondomar. Ao acto asistiron o alcalde do municipio Fernando Guitián, o concelleiro de Servizos, Juan Carlos González Camesella e persoal do Concello.

O Concello de Gondomar, a través da concellaría de Vías e Obras, que dirixe Jesús Salgueiro, vén de acometer traballos de reforzo dun dos tallamares da Ponte de Mañufe, á espera de elaborar un proxecto para a súa completa reparación.

O Concello de Gondomar informa de que, de xeito preventivo, se levou a cabo a limpeza das marxes do río Zamáns ao seu paso polo municipio, co fin de minimizar os efectos das enchentes do río, que cada ano afectan a esta zona.

A actuación centrouse nas marxes do río da zona da Praza de Abastos, onde se rozou e limpou o exceso de vexetación que obstaculizaba a libre circulación da auga. Á súa vez, o acondicionamento das marxes deixou ao descuberto o antigo paso de pescadores sepultado, dende hai anos, baixo as silveiras.

A actuación, levada a cabo por operarios da Concellaría de Vías e Obras, súmase a outras medidas adoptadas dende o Concello como a limpeza de residuos realizada o pasado día 22 de setembro nos ríos Miñor e Zamáns ou as solicitudes presentadas ante Augas de Galicia para que actúe no río Miñor retirando madeiros e maleza que puidesen taponar a canle impedindo que as augas discorran normalmente.