Concello de Gondomar

Gondomar implica aos mozos e as súas familias na detección de problemas como o acoso

Facilitar as ferramentas e coñecementos precisos aos máis novos para facer fronte a problemas reais e existentes, como o  ciberacoso, os  transtornos alimentarios ou as novas formas de violencia de xénero é o obxectivo do ciclo de charlas promovido polo goberno de Gondomar, a través da concellería de  Xuventude.

Baixo o título “Falamos” este ciclo, conformado por 15 charlas, desenvolverase durante todo o mes de novembro nos Institutos de Ensino Secundario Auga da Laxe e Terra Turonio, dirixido a mozos/as de idades comprendidas entre os 12 e 14 anos.

Con eles traballarase ao redor de catro temáticas:  Ciberseguridade, transtornos alimentarios, novas formas de violencia e Intelixencia Emocional. A través de intervencións, que se completarán con talleres nos que a súa implicación será fundamental, búscase visibilizar como problemas ante a mocidade estas cuestións, á vez que se facilitan as pautas para saber abordalos e atallalos cando se presentan.

Paralelamente, coa colaboración das ANPAS dos centros, buscarase a implicación das nais e pais no programa coa celebración de catro charlas, dirixidas especialmente ás familias, os días 22 e 29 de novembro, e, 13 e 20 de decembro, e que se abrirán ao público en xeral, dada a importancia dos temas que nelas abórdanse.

O obxectivo é dotar ás familias de pautas para detectar a existencia dalgún destes problemas nos seus fillos/as, así como as ferramentas e medios para poder abordalos de forma correcta, ben na propia contorna familiar, no centro escolar ou coa axuda de especialistas.

Gondomar, 06 Novembro 2019

Gondomar e Radio  ECCA facilitarán o acceso de adultos ao Graduado da ESO

O goberno local de Gondomar, a través da súa concellería de Formación e Emprego, poñerá en marcha cursos dirixidos a adultos para facilitar a súa titulación no Ensino Obrigatorio. Así se acordou esta mañá no encontro mantido polo rexedor da localidade, Paco Ferreira, coa delegada de Radio  ECCA en Galicia, Paula San Juan, e Patricia Pousa, técnica de proxectos da organización.

Dirixidos a maiores de 18 anos estes cursos, que inicialmente comezarán a impartirse o ano que vén, preséntanse como unha alternativa ao actual sistema da “proba libre” onde o número de aprobados, segundo explicou a delegada de Radio ECCA, é cada ano menor debido ao nivel de esixencia e dedicación que precisa a preparación deste exame.

Os cursos do programa que se poñerá en marcha en Gondomar dividiranse en catro módulos ofrecendo así a posibilidade de adaptalos ao nivel e necesidades de cada alumno, e facilitando a conciliación coas cargas familiares ou laborais, dependendo do caso. Cun método semipresencial, poderán estudar a materia a través de audios e libros sobre os que traballar, así como coa asistencia a titorías dúas veces á semana no municipio onde poderán resolver calquera dúbida.

O concello de Gondomar sería o primeiro da provincia de Pontevedra no que se poñerá en marcha este sistema, que xa está a funcionar en diferentes municipios do territorio español e que facilita a obtención do título oficial da ESO recoñecido polo Ministerio de Educación.

O alcalde da localidade, Paco Ferreira, sinala a importancia deste tipo de accións “porque ademais de potenciar a formación e educación entre persoas que, por distintas razóns non puideron completala no seu momento, tamén supoñen un paso máis para axudalas a acceder ao mercado laboral”.

“Trátase de poñer ao alcance dos nosos veciños todas as ferramentas posibles para incrementar as súas opcións de atopar un emprego e mellorar a súa calidade de vida”, manifestou Paco Ferreira.

Concello de Gondomar

Radio  ECCA é unha Fundación sen ánimo de lucro, que naceu en Canarias no ano 1965 como centro educativo e de aprendizaxe, que emprega as novas tecnoloxías para facer o seu labor educativa. Con sedes en diferentes comunidades autónomas, en Vigo funciona desde hai máis de 40 anos apostando por levar a mellor formación posible ao maior número de persoas, principalmente a quen máis necesidades educativas teñen. Máis de dous millóns de persoas formáronse a través de Radio ECCA en España.

Gondomar 05 novembro 2019