Poderán solicitar a inclusión no Pontegal ata o 1 de febreiro as bandas de música, masas corais, grupos folclóricos, grupos de gaitas, bandas de gaitas, agrupacións de música tradicional, de música clásica ou de teatro, entre outros, co fin de contribuír a difundir e promover a música, o folclore, o teatro, a danza, o audiovisual e as demais manifestacións artísticas.
Pontegal é un programa a través do cal a Deputación de Pontevedra colabora cos concellos e asociacións sen ánimo de lucro da provincia na contratación de grupos, compañías e artistas inscritos no programa. No ano pasado contou con 1.346 grupos, compañías e artistas inscritos e se apoiaron 2.595 actuacións organizadas dende concellos e asociacións. Espérase que o número se incremente xa que este ano a aposta polo programa é meirande, cunha partida que ascende dos 700.000€ da edición do ano pasado aos 800.000€ cos que contará Pontegal 2017.
Solicitude dunha actuación:
As entidades solicitantes, como organizadoras dos actos, poranse en contacto coas agrupacións acollidas ao Pontegal para concretar a data e as condicións da actuación e facilitarlles un escenario ou marco adecuado para a realización do concerto ou a escenificación da obra, sen que se lles presente ningún impedimento.
Os adxudicatarios de cada actuación están obrigados a facer mención, na propaganda e na publicidade oral e escrita que confeccionen, do patrocinio do acto por parte da Deputación de Pontevedra, obriga que, de non se cumprir, deixaría sen efectos a concesión realizada.
