Este martes inaugurouse na Casa Consistorial de Gondomar a exposición fotográfica do VII Certame Fotográfico, do pasado 2013, Viaxando.
A exposición itinerante, que permanecerá aberta ata o 1 de xullo, recolle un total de 36 instantáneas achegadas por participantes dos concellos de Baiona, Gondomar, Tomiño, O Rosal, A Guarda, Porriño e Tui.
A gañadora do premio da VII edición deste certame foi Carmen Díaz del Río Núñez-Torrón coa fotografía MAUSEOLEO HO CHI MINH, HANOI, presentada na OMIX de Gondomar.
A actividade, organizada polas sete OMIX do Baixo Miño e Val Miñor e pola Casa de Xuventude de Tui, é un certame cuxa traxectoria se afianza ano tras ano, chegando a converterse en todo un referente para a xuventude con interese pola fotografía.
Aberto o prazo da VIII edición
Paralelamente á inauguración da mostra, vén de abrirse o prazo para participar na oitava edición deste certame. Poderán participar os mozos e mozas de entre 12 e 35 anos cunha única fotografía que terá que ser orixinal e inédita, cunha temática que responda ao título do certame, Viaxando. As bases e fotografías a concurso serán recollidas na OMIX do concello correspondente.
