Un ano máis Gondomar celebra o Entroido cunha programación chea de actividades. A Concellaría de Cultura e Festexos de Gondomar que dirixe Ignacio Troncoso, organiza como acto principal deste Entroido 2014 o tradicional Gran Desfile de Comparsas, que se celebrará o domingo día 2 de marzo.
Abrirá a xornada a lectura do pregón, que correrá a cargo do Gondomar C.F., co motivo da celebración do seu centenario. O trío Azar será o encargado de presentar o desfile que dará comezo a partir das 16.00 horas e no que participarán un total de 15 comparsas vidas de Nigrán, Tui, Tomiño, A Guarda, Vigo e Gondomar.
- Moito Entroido: A casa de Mickey
- C.C. A Merced de Chaín
- Os lunáticos de Chaín
- Chinatau
- Super Chef
- Asociación Cultural Dreogán Val Miñor: O espertar dos Marionetas
- Os Macanudos: Os Pelimacanudos
- Os Terribles de Tebra
- Os Tenebrosos de Couso
- A tasca dos Mouros
- Asociación de Veciños Galiñeiro de Vincios: Vinciocas
- Asociación de Veciños de Beade: Love Music
- La mar de salaos
- Asociación Carnavales Mañufe: Unha comparsa la mar de salá
- Chegaron os que faltaban
Logo de pasar polas rúas Eduardo Iglesias e Ángel Urzaiz, realizarase unha pequena parada na praza do Concello, onde o trío Azar amenizará a festa.
A festa continúa o martes 4 de marzo coa verbena musical de Entroido que, desde as 22.00 horas, estará amenizada pola orquestra 'Yucatán'. A partir das 00.00 horas daranse a coñecer as comparsas e carroza gañadoras e realizarase a entrega de premios.
Para as comparsas máis orixinais haberá premios:
- 700 euros 1º clasificada
- 600 euros 2º clasificada
- 500 euros 3º clasificada
- 400 euros 12 axudas para as restantes comparsas participantes
Haberá tamén un premio especial para a mellor carroza das comparsas presentadas cun importe de 300 €.
O mércores, 5 de marzo, celebrarase o tradicional Enterro da Sardiña. Ás 19.30 horas terá lugar o velorio de Dona Sardiña e ás 20.30 horas comezará a procesión, a lectura do testamento e o propio enterro de Dona Sardiña.
Actividades para os máis pequenos
Os máis pequenos tamén gozarán deste Entroido 2014. A Concellaría de Cultura e Festexos organiza para o vindeiro 28 de febreiro a Gran Carreira pedestre da comparsa escolar, 'Corre coa túa máscara!'.
O éxito acadado nos pasado anos, fai que o Concello aposte de novo por este, xa tradicional evento, no que participarán mozos e mozas dos sete centros educativos do municipio. Desde a Concellaría de Cultura e Festexos estímase que serán preto de 1.300 os participantes que acudirán este ano ao desfile.
A carreira sairá ás 11.00 horas desde o Pavillón de Deportes e percorrerá as principais rúas do casco de Gondomar durante unha hora aproximadamente. A chegada será ás 12.00 horas voltando ao Pavillón de Deportes.
O luns 3 de marzo, terá lugar a Festa Infantil. Desde as 16.30 horas, na Praza da Alameda os máis pequenos poderán participar nun obradoiro de circo, xogar nos inchables e sorprenderse coa maxia con Animar-T e o Mago Román.
O martes 4 de marzo, a partir do 16.30 horas, celebrarase o Desfile Infantil na Praza da Alameda onde tamén haberá música e baile con Aminar-T.
En caso de chuvia, estas actividades trasladaranse ao Pavillón.
