Gran acollida do primeiro curso de Autodefensa organizado polo departamento de Igualdade do concello de Gondomar, e promovido pola Secretaría Xeral de Igualdade da Consellería de Emprego e Igualdade.
En total 16 mulleres do municipio de idades comprendidas entre os 18 e 50 anos, aproximadamente, anotáronse a esta actividade quedando fora moitas outras interesadas debido ás medidas sanitarias vixentes pola pandemia que impediron ampliar o número de participantes.
Trátase dun curso de adestramento físico e psicolóxico para crear protocolos de actuación ante diversas situacións. Cunha duración de 8 horas é impartido por Manuel Herbón, membro dos Corpos e Forzas de Seguridade, e monitor especialista en defensa persoal, integrante da Federación Galega de Loita e docente da Academia Galega de Seguridade Pública.