O xurado do certame anual visitou esta mañá a vila, acompañado polo alcalde, Paco Ferreira, e o edil de Medio Ambiente, Brais Misa, así como polos técnicos do departamento que explicaron as actuacións executadas no último ano para avanzar na mellora ambiental e social do concello.
Os membros do xurado recibiron as explicacións sobre a memoria desenvolvida para a ocasión na que destaca a recente adquisición e limpeza da Casa Peralba para destinar a usos sociais da veciñanza nun futuro. “Un investimento importante para o noso concello e que reverterá na mellora non só do seu aspecto se non tamén da calidade de vida dos nosos habitantes”, manifestou o rexedor Paco Ferreira.
Nesa mesma dirección a construción do novo parque canino-lúdico atendendo unha demanda social existente na maior parte das localidades como é a dotación de espazos para o uso e goce das mascotas, que neste caso completouse cun parque biosaudable. Suma Gondomar, en busca dese terceiro galardón, a mellora das zonas verdes coa inclusión de novas xardineiras ornamentais, como a que loce nas inmediacións do campo de fútbol de As Cercas.
O alcalde de Gondomar, Paco Ferreira, mostrou a súa confianza en sumar este ano unha flor de honra máis de “Vilas en Flor” e reiterou o seu compromiso firme “de seguir traballando por facer de Gondomar unha localidade sostible e referente en materia de dinamización ambiental e paisaxística”.
O certame “Vilas en flor” está organizado pola Fundación Juan de Vega, a Asociación de Viveristas do Noroeste e a Asociación Galega de Empresas de Xardinería, e esta é a terceira edición na que participa Gondomar que o pasado ano foi distinguido con dúas flores de honra por o “gran esforzo en dixitalizar as zonas verdes” e as boas actuacións non núcleo urbano.
