O alcalde de Gondomar, Paco Ferreira, presidiu a concentración que este mediodía celebrouse en memoria de Soledad Rey Valverde, veciña de Mañufe, que este mércores foi presuntamente asasinada polo seu marido. No acto estivo acompañado polos integrantes da corporación municipal, a presidenta da Deputación Provincial de Pontevedra, Carmela Silva; a Subdelegada do Goberno, M. Carmen Larriba; representantes da Garda Civil e Polícía, así como parte da familia da vítima.
Paco Ferreira mostrou o seu apoio e o de todo o gobernó local aos familiares e cualificou de “atroz” o asasinato de Soledad Rey Valverde “que nos deixou consternados e que nos demostra que non podemos baixar a garda e temos que seguir loitando contra a violencia machista”.
O rexedor cedeu a lectura do manifesto redactado para a ocasión á Presidenta da Deputación de Pontevedra, Carmela Silva, que visiblemente afectada sinalou “que fartas estamos as mulleres de ter que estar facendo minutos de silencio, lendo manifestos! Ver chorar a familia dunha muller asasinada é un profundo dor, e a verdade é que as mulleres choramos de carraxe”
Lembrou que non se pode dar nin un paso atrás na loita contra a violencia machista e subliñou que “non podemos, como sociedade nin como administración, mirar cara a outro lado. Ao contrario, alzaremos cada vez máis a voz para denunciar estes crimes e a violencia de xénero ata conseguir erradicala, lograr a violencia cero”.
O concello de Gondomar decretou tres días de loito oficial en memoria de Soledad Rey Valverde e suspenderá todas as actividades previstas ata o vindeiro domingo, entre as que se atopa o aceso da iluminación do Nadal este próximo sábado, que se pospoñerá ao domingo día 06 de decembro.
