O goberno de Gondomar implementará o seu persoal coa contratación de 9 persoas mantendo así a súa aposta polas políticas activas de emprego, que adquiren máis importancia neste momento que vive a nosa sociedade inmersa nunha desescalada “no que todas as medidas que potencien a creación de postos de emprego son máis necesarias que nunca”, manifestou o rexedor Paco Ferreira.
En total contrataranse nove persoas, un técnico de turismo, 2 de condutores e 6 peóns de obras públicas. Os interesados deberán estar desempregados e rexistrados como demandantes de emprego no Servizo Público de Emprego de Galicia. Será a oficina de emprego a que confecciona a lista de candidatos/ as para o proceso selectivo, que se poñerá en marcha o próximo día 1 de xuño.
Unha vez seleccionados o concello, con cargo ao financiamento do Plan Concellos da Deputación de Pontevedra, lles contrarará por seis meses. “Mellorar a atención e cobertura das demandas dos nosos veciños é un dos nosos obxectivos, e para iso é fundamental dotar de máis recursos humanos a administración local, á vez que creamos novos empregos, sempre necesario”, explica o alcalde.
Por outra banda, desde esta semana o servizo de Vías e Obras reforzarase coa adquisición dunha nova furgoneta de 9 prazas con remolque elevador, na que se investiron 30.0000 euros. Con este novo vehículo crece o actual parque móvil do concello para dar servizo a todas as súas parroquias nas que desde hai xa unhas semanas iniciáronse os traballos de roza, paralizados a consecuencia do confinamento decretado pola alarma sanitaria.
Labores nas que se están empregando tres tractores de brazo mecanizado e persoal a pé para retirar a materia vexetal sobrante que se traslada posteriormente aos puntos acordados coas Comunidades de Montes das parroquias. Un proceso co que “apostamos pola reciclaxe dos materiais rozados para a súa conversión en compos e futura reutilización como abono, nun claro exemplo do que é a economía circular e sostible que perseguimos.”
Respecto a isto Paco Ferreira fai fincapé “en que durante o proceso de roza non utilizamos herbicidas nin produtos tóxicos para a contorna natural co fin de garantir a sustentabilidade do medioambiente desde o inicio ata o final, conclúe o rexedor.
