Gondomar súmase un ano máis ao negro contra a violencia de xénero
O goberno local de Gondomar, a través da súa concellería de Igualdade, súmase un ano máis á denuncia unánime contra a violencia de xénero programando, con motivo da celebración do 25 N, Día Internacional da Eliminación da violencia contra a muller, unha serie de actividades que arrincarán este mesmo venres coa iluminación do concello en cor morada, que se manterá durante unha semana.
Con ela dáse continuidade a un programa que se deseñou buscando a máxima implicación da sociedade, con diferentes actividades programadas ao longo de todo o mes de novembro. O acto central terá lugar o vindeiro luns, día 25, a partir das 12.00 do mediodía, coa convocatoria dunha concentración #ante o concello e lectura dun manifesto, á que se convida a participar a todos os veciños e veciñas de Gondomar.
Ademais situarase na Praza o “punto vivo de Igualdade” no que se repartirá material específico da campaña “En negro contra as violencias”. Tamén se facilitará información sobre as distintas políticas e accións en materia de igualdade que se están desenvolvendo a nivel local e nacional na loita contra a violencia de xénero, facendo fincapé na sensibilización e educación nesta materia nas novas xeracións.
Cuestións que tiveron presentes na Concellería de Igualdade de Gondomar con campañas desenvoltas nos colexios e institutos do concello, como “Camisetas solidarias”, na que os estudantes de 3ª de Primaria deseñaron lemas contra o machismo e a violencia de xénero, que plasmaron en camisetas que, posteriormente, expuxéronse nos centros.
A eles sumaranse os estudantes dos IES cos que se prepara un encontro-debate, coa colaboración da Secretaría Xeral de Igualdade, baixo o título “Hai saída grazas a ti”.
Por último, un ano máis se contou co apoio do comercio local cuxos establecementos se sumaron ao negro, por terceiro ano consecutivo, “nunha mostra clara de que Gondomar rexeita a violencia contra a muller, inadmisible en calquera sociedade e fronte á que ninguén debe mirar cara a outro lado”, concluíu a edil Nuria Lameiro.
